Төзекләндерелгән җәмәгать суды бинасын күрергә, дип Чүпрәлегә олы кунаклар килде
Капиталь төзекләндерү үткәрелгән җәмәгать судьялары урнашкан бинаны күрергә Казаннан бер төркем югары даирәдәге кунаклар килде.
Алар арасында республиканың Югары суды рәисе Илгиз Гилазов, Юстиция министры Лариса Глухова, министр урынбасары Надежда Рогозина һәм министрлыкның бүлек начальнигы урынбасары Ельза Ишмөхәммәтова бар иде.
Җәмәгать судьялары урнашкан бина алдында аларны Чүпрәле муниципаль районы башлыгы Александр Шадриков, район суды рәисе Алсу Рәкыйпова, район прокуроры Илдар Маликов һәм РФ Эчке эшләр министрлыгының Чүпрәле районы буенча бүлеге начальнигы Рөстәм Мөхәммәтҗанов каршы алды. Исегезгә төшерәбез, республиканың Юстиция министрлыгы һәм җирле үзидарә органнары ярдәме белән җәмәгать суды әлеге бинага 2012 елның 24 октябрендә күчкән иде. Моңарчы ул С. Нәфиев урамында урнашкан район суды бинасында эшләп торды. Сер түгел, ике судның бер бинада нәтиҗәле эшчәнлек алып баруы җиңел булмады, әлбәттә. Бер залда чиратлашып суд утырышлары үткәрү бик кыенга туры килде. 14,8 квадрат метр мәйданлы канцелярия бүлмәсендә дүрт кеше хезмәт куйды. Архив биләгән бүлмә дә тугыз квадрат метр гына иде.
Норматив кагыйдәләргә туры килерлек җайлы бина булмаганлыктан әлеге проблема озак хәл ителмичә килде. Ниһаять 2012 елның октябрендә җәмәгать суды үз эшчәнлеген шушы бинада дәвам иттерә башлады. Аны ачу тантанасына килгән ТРның Югары суды рәисе Илгиз Гилазов: "Без шәһәр һәм район судларында эшләүчеләр өчен шартлар тудыру белән генә чикләнмибез, җәмәгать судларына да мөмкин булганча ярдәм итәбез",- дигән иде. "Әлеге бина тулысынча төзекләндерелмәгән, шулай да эшләү өчен җитәрлек шартлар бар",- дип тә өстәде ул. Соңгы елларда ике катлы бу бинаның эчен- тышын капиталь төзекләндерү буенча зур эшләр башкарылды. Беренче катта паспорт- виза хезмәте, суд приставлары бүлеге һәм җәза үтәтү инспекциясе урнашкан. Икенче катны тулысы белән җәмәгать суды били. Төзүчеләрнең эшенә югары билге куелды. Барлык бүлмәләр дә якты һәм заманча жиһазландырылган. Төзекләндерү эшләрен яхшы сыйфат белән башкарып чыкканнары өчен "Строитель" җәмгыяте җитәкчесе Рамил Хисамовка рәхмәт сүзләре әйтелде. Әлеге оешма соңгы ике айда гына да биредә 2,5 миллион сумлык эш башкарган. Югары суд рәисе Илгиз Гилазов судьяларга һәм аппарат хезмәткәрләренә уңышлар, исәнлек- саулык теләде.
Иң мөһим һәм кызыклы язмаларны Татмедиа Telegram-каналында укыгыз
