Туган Як
  • Рус Тат Чув
  • Гасыр кичкән Акъәби

    Чүпрәле районы тарихта илне-көнне яхшырту, ямьләндерү өлкәсендә намуслы хезмәте белән хөрмәт казанган өлкән буын кешеләре белән лаеклы горурлана. Алар арасында гасыр кичкәннәре дә шактый. Иске Кәкерле авылында гомер кичерүче Мәүлидә апа Иматдинова шундыйлардан.

    Мәүлидә апа мөселман календаре буенча Мәүлет аенда туа, кыз фамилиясе дә Мәүлетова аның. Шуңа да әнисе кызына матур итеп Мәүлидә исемен куша, озын гомерле, бәхетле яшәвен тели, ананың теләкләре тормышка да аша. Гомумән, балалары, якыннары әйтүенчә, Мәүлидә апаларның нәселләре озын гомерле. Авылда аның бертуган сеңлесе яши, быел ул да 95 яшен билгеләп үтәчәк. Әбиләре исә 110 яшенә җитеп вафат булган.

    Бер гасырлык олы бәйрәме белән юбилярны котларга район башлыгы Александр Шадриков килде, Президентлар котлавын, бүләкләр тапшырды. Мәүлидә апага исәнлек белән гомер итүен, үткәннәре-күргәннәре өчен олы рәхмәтен белдерде.

    Олы яшьлек юбилярның үзе турында сөйләгәндә, аның ачык күңелле булуын әйтергә кирәк. Балалары җырла әле әнкәй, дигәч тә, ул татарча, матур итеп, "Ага суларны" сузып җибәрде, Коръән китабыннан сурәләр дә укып бирде.

    Мәүлидә апа 19 яшендә тормышка чыга, ире Нәбиулланың әтисе элек елларда волость башлыгы булып тора, тик тиф авыруыннан вафат булып, балалары ятим кала. Нәбиулла сугыш башлангач, 1941 елда, фронтка китә, әсирлеккә төшә, Германиягә озатканда, качып кала. 4ай Украина җирләре буйлап йөргәннән соң, ниһаять, партизаннар отрядына килеп кушылалар алар, аннары Украина фронтына эләгәләр. Набиулла абый атлар белән кораллар ташуга җаваплы итеп билгеләнә, бер задание вакытында минага эләгеп, аяклары каты җәрәхәтләнә, шуннан ул II төркем инвалид булып, 1945 елның август аенда, авылга кайта.

    Сугышка киткәндә аның 3,5 яшьлек улы, 8 айлык нәни кызчыгы калган була. Иматдиновлар гаиләсендә барлыгы 8 бала үсә, бүген исә дүртесе генә исән. Йөзъяшәр Акъәбинең 9 оныгы, 14 оныкчыгы бар.

    Ялгыз ике яшь бала белән калган Мәүлидә апаның сугыш еллары ачлыгы, ялангачлыгы белән истә кала. Кырда көрәк белән җир басалар, сыер җигеп салам ташыйлар, көндезге сменада эшләгән өчен ярты кило, төнге сменада эшләгән өчен 1 кило икмәк бирәләр ул вакытта. Сугыштан имгәнеп кайткан Нәбиулласы да тиз генә аягына баса алмый, аны тәрбияләү дә Мәүлидә апа җилкәсенә төшә. Шулай да уфтанмый, бүгенгәчә шушы сабырлыгын саклап, дәүләт тарафыннан төзелгән "ветеран өе"ндә матур гына яши. Балалары янәшәдә генә, киләләр, ярдәм итәләр.

    "Аккан сулар кире кайтмый... яшь гомерләр дә шулай", дип җыр суза Мәүлидә әби. Һәм "никадәрле генә авыр булмасын, яшьлек-яшь чак, көчле чак шул ул",-дип өстәп куя.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: