Туган Як
  • Рус Тат Чув
  • Чүпрәледә Җиңү көнендә амфитеатр ачылды

    Быел Җир планетасы фашистик Германиясе өстеннән Бөек Җиңүнең 72 еллыгын бәйрәм итте. Безнең ил халкы өчен бу бәйрәм аеруча кадерле. Аны зур шәһәрләрдә дә, кечкенә авылларда да билгеләп үтәләр. Ул көнне Җиңү бәйрәме район үзәгендәге Сугыш һәм Хезмәт даны монументындагы мәңгелек ут янына веноклар кую белән башланып китте.

    - Кешелек дөньясы бүген иң күркәм һәм иң кадерле бәйрәмнәрнең берсе - Бөек Җиңүнең 72 еллыгын билгеләп үтә. Без аны тынычлык һәм гаделлек, батырлык һәм кыюлык бәйрәме буларак кабул итәбез,- диде митингны ачканда муниципаль район башкарма комитеты җитәкчесе урынбасары Айрат Җәлалов. Мәйданда Россия Федерациясе һәм Татарстан Республикасының дәүләт Гимнары яңгырый. Район җитәкчелеге, хезмәт коллективлары вәкилләре һәм дин әһелләре, бәйрәмгә кайткан кунаклар мәңгелек ут янына веноклар һәм чәчәкләр куйдылар. Район башлыгы Александр Шадриков райондашларга мөрәҗәгать итеп: "Россия тарихында моннан да рәхимсез һәм канкойгыч сугыш булмаган. Фашистларның басып алуыннан дөньяны коткарган, дошманнан илне саклап калган солдат батырлыгыннан да зур батырлыкның да тиңдәше юк. Кулына корал тотып каһарманлык үрнәкләре күрсәткән солдатларның даны мәңгелек. Аларның исемнәре ил тарихы елъязмасына алтын хәрефләр белән язылган",- ди Александр Валерьевич. Мәйданда бер минут тынлык игълан ителде. Эчке эшләр бүлеге хезмәткәрләре автоматлардан залп бирде. Татарстан Республикасының Дәүләт Советы депутаты Ринат Гайзатуллин республика Президентының бәйрәм котлавын халыкка ирештерде.

    Шулай ук чүпрәлеләргә бәйрәм котлауларын Татарстан Республикасы буенча монополиягә каршы Федераль хезмәт Идарәсе җитәкчесе урынбасары Рузалин Хәбибуллин һәм ветераннар исеменнән Бөек Ватан Сугышы ветераны, өченче Украина фронты составында Запорожьены, Будапештны, Венаны, Праганы азат итүдә катнашкан һәм батырлыклары өчен Кызыл Йолдыз ордены һәм күп кенә медальләр белән бүләкләнгән Сәгыйть Бикчуров җиткерде. - Бүген без әтиләребез һәм бабайларыбыз батырлыгы алдында баш иябез. Алар шушы дәһшәтле сугышта җиңү яуладылар, алар үрнәгендә без яшь буынны патриотик рухта тәрбияләргә тиешбез. Без - яңа буын вәкилләре яу кырында башларын салган, кемнәр исән әйләнеп кайткан һәм тылда тиңдәшсез батырлык күрсәткән райондашларыбыз турындагы хәтерне мәңге сакларга тиешбез,- диделәр чыгыш ясаучылар. Мәктәп укучылары сугыш һәм тыл ветераннарына кызыл лалә чәчәкләре бүләк иттеләр. Яшь буын Ватан бәйсезлеге өчен гомерләрен корбан иткән бабайларын авыр яра уларак искә алалар. Аларның да бит якты хыяллары бар иде, тик сугыш афәте генә аларны юкка чыгарды. Тик хәзер Җиңү бәйрәме генә бүгенге яшь буын белән фронтовиклар, җиңүчеләр буыны бәйләнеше булып хезмәт итә. Мәңгелек ут янында караулда тору кебек мактаулы хокук күптармаклы технологияләр техникумының хокук саклау Форпост отрядына бирелде. Маршировкада да белем бирү учреждениеләре һәм техникум укучылары катнашты. Буа һәм Чүпрәле районнары буенча хәрби комиссар урынбасары, майор Рамил Җәмалетдинов сүзләренчә, һәр отряд сугыш һәм тыл ветераннары алдыннан лаеклы үтәргә тырышты. Митинг тәмамлангач район башлыгы Александр Шадриков фронтовикларны "Нурлы" кафесына чәй өстәле артына чакырды.

    Көндезге нәкъ 11 сәгатьтә район халкы өчен Җиңү бәйрәме уңаеннан тагын бер зур вакыйга - Амфитеатр ачу тантанасы булды. Район үзәгендәге зур чокырда кайчанда булса шундый тамаша кылырлык заманча театр корылмасы төзелер дип кем дә булса уйладымы икән? Әлбәттә, халыкның ялын тиешле дәрәҗәдә оештыру өчен күп көч куйган район башлыгы Александр Валерьевичка һәм республикабыз Президенты Рөстәм Миңнехановка чүпрәлеләр ихлас рәхмәтләрен әйтәләр. Ул көнне Амфитеатр төзүдә иң актив катнашкан оешмаларга Рәхмәт хатлары да тапшырылды. Яңа сәхнәдә Җиңү бәйрәменә багышланган хәрби - патриотик җырлар яңгырады. Берүк вакытта күп функцияле үзәк алдындагы яшел чирәмле мәйданда Гадәттән тыш хәлләр службасы хезмәткәрләре оештырган кыр кухнясы райондашларны һәм кунакларны солдат боткасы белән һәм кайнар чәй белән сыйлады.

    Бәйрәмнәрдән барлык фотоларны түбәндәге сылтамалар буенча карый аласыз:

    Торжественный митинг ко Дню Победы 9 мая в Дрожжановском районе 2017

    Парад Победы 9 мая 2017 года в Дрожжановском районе

    Ко Дню Победы 9 мая в Дрожжановском районе открыли амфитеатр

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: