Туган Як
  • Рус Тат Чув
  • Чүпрәледә 1000нче Ана капиталы сертификаты тапшырылды

    Бүген район ЗАГС бүлегендә тантаналы шартларда җиде бәхетле әнигә "Ана капиталы" сертификаты тапшырдылар.

    Сертификатларны тапшыру яшь гаилә: Марина Романова һәм Евгений Селифанкинның никахларын рәсмиләштерү тантанасына туры килүе чарага тагын да ямь өстәде.

    Әниләрне һәм яшь гаиләне пенсия фондының район бүлеге начальнигы Илмир Измайлов тәбрикләде. Ул әниләргә сертификатлар тапшырды һәм әлеге акчаларны торак шартларын яхшыртуга, баланың белем алуына тотарга, шулай ук, әниләрнең тупланма пенсия өлешенә юнәлдерергә мөмкинлеген әйтеп үтте.

    Илмир Измайлов, пенсия фондының район бүлеге начальнигы:

    -Чүпрәле районы буенча бүгенге көнгә барлыгы 1003 гаиләгә ана капиталы сертификаты тапшырылды. Шуның 773е инде әлеге акчаларны торак шартларын яхшыртуга тотарга өлгергән. Бу беренче чиратта торак алу яисә төзү өчен алынган кредитларны каплауга киткән. Гомумән, район буенча ана капиталы ярдәмендә торак шартларын яхшыртуга тотылган акчаның күләме 255,7 миллион сумны тәшкил итә. Республика буенча Ана капиталын алучылар саны 150 меңнән дә артык гаилә исәпләнә. Исегезгә төшерәбез, 150 меңенче сертификат Яр Чаллыдан Шәйхаттаровлар гаиләсенә тапшырылды. Бүген бездә дә мондый тантаналы сан бар. Район буенча 1000нче сертификатка Иске Чүпрәледән Нигъматуллиннар гаиләсе ия, котлыйбыз аларны. Ана капиталының күләме ел саен индексацияләнә, 2007 елда ул 250 мең сум булса, быел, 2014 елда 429 мең 408 сум 50 тиен. Закон нигезендә ана капиталын балага өч яшь тулгач файдаланырга мөмкин. Торак йорт төзү яки сатып алу өчен алынган кредит һәм займнарны каплау өчен файдаланганда балага өч яшь тулганын көтмәскә дә була.

    Район ЗАГС бүлеге начальнигы Гөлсирә Галлямова никахларын рәсмиләштерүче яшь гаиләләр арасында йомшак уенчыклар бүләк итүнең матур традициясе яшәвен искәртеп үтте. Бүген әниләр адресына әйтелгән матур теләкләргә бу бүләкләр янә бер ямь өстәде.

    Надежда һәм Дамир Нигъматуллиннар, 1000нче юбилейлы Ана капиталы сертификаты ияләре:

    -Гаиләбезгә шатлык булып үткән елның декабрь аенда икенче улыбыз Тимур дөньяга аваз салды. Беренче балабыз Данил исә 2 нче сыйныф укучысы. Ана капиталын менә шулай тантаналы шартларда тапшырулары бик куанычлы, оештыручыларга зур рәхмәт белдерәбез. Әлегә акчаларны ничек тотарга икәнлеген уйлашабыз, мөгаен, торак шартларын яхшыртуга юнәлдерергә булыр.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: