Яшьләргә бөтен юллар ачык

Бүгенге яшьләр-җәмгыятьнең иң актив өлеше булып тора. Шуңа да Аграр яшьләр берләшмәсенең райондагы бүлек җитәкчесе Зөлфәт Сәгъдиев чыгышында, үткәрелүче чараларда яшьләр белән эшләүне активлаштыру мәсьәләсен күтәрде. Моның өчен төрле фестивальләр, конкурслар, гомумән, яшьләрнең ялларын кызыклы үткәрү чараларын үткәрүне максат итте. 2012 елда әлеге уңайдан башкарылган эшләргә тукталды. Аеруча бу өлкәдә актив эшчәнлек алып барган район үзәге яшьләрен, мәктәп укучыларын телгә алды.

Соңгы елларда яшьләрне хезмәт урыннары белән тәэмин итү, мәдәният үсеше, эмоциональ ярлылык, яшьләрнең җәмгыятькә карашы хакында да сүз кузгатылды җыелышта.

Әйе, бүгенге яшьләрне совет чоры яшьләре белән һич кенә дә чагыштырып булмый. Китап, газета уку, илдә, районда булган яңалыклардан хәбәрдар булу дигәннәр артта кала бара. Шуңа да берләшмә беренчел максат итеп, шушы бушлыкларны тутыруны бурыч итә.

Моннан тыш, яшьләрне эшмәкәрлеккә өйрәтү дә берләшмәдә бер юнәлеш булып тора. Әлеге юнәлештә Шланга авылыннан Альберт Мөхәррәмов һәм Иске Чүпрәледән Фәнил Яфизов укуларда булып, күп кенә яңалыкларны яшьләргә җиткерергә тырышалар. Кызганычка каршы, башка авылларда яшьләр әлегә бу өлкәдә "читтә тору" алымын хуп күрәләр. Ә юкка, чөнки бу мәдәният, социаль өлкә үсешендә зур этәргеч булыр иде.

Шуңа да, Зөлфәт Сәгъдиев агымдагы 2013 елда бу юнәлештә эшләүне өстенлекле бурычларның берсе итеп күрсәтте.

Чарада, шулай ук, яшьләрнең форум эшләре, чыгарылыш кичәләре үткәрү, гомумән, 2012 ел дәвамында башкарылган эшләр барланды. Әлеге уңайдан беренчел Аграр яшьләр берләшмәләренең вәкилләре Альберт Мөхәррәмов һәм Фәнил Яфизов док-ладлары тыңланды.

Чарада Аграр яшьләр берләшмәләренең беренчел оешмаларын зоналарга бүлү хакында да сүз кузгатылды. Бердәм тавыш белән Иске Чүпрәле, Иске Шәйморза, Иске Чокалы һәм Матак аграр яшьләр берләшмәләренең төп зоналары өчен тавыш бирелде. Билгеле, алар үз эченә берничә авылларны берләштерәчәк, шулай ук, чарада һәр зонаның җитәкчесе дә бил-геләнде.

Аграр яшьләр берләшмәсе агымдагы елда беренче эшен студентлар белән очрашудан башламакчы була, әмма ул гадәти булмаячак. Чарада район җитәкчеләре катнашыр дип көтелә. Димәк, яшьләр өчен үзләрен кызыксындырган мәсьәләләрне уртага салып сөйләшергә тагын бер мөмкинлек булачак.