Дәүләт хезмәткәрләре спартакиадасы

Ул көнне республиканың Иделаръягы зонасына кергән Апас, Буа, Кайбыч, Тәтеш, Чүпрәле, Югары Ослан, Кама Тамагы һәм Казан артындагы Биектау районы командалары Яшел Үзән шәһәренә җыелды. Безнең районнан әлеге чарада утызлап спортчы катнашты. Һәр делегация сигез командага бүленеп мини-футбол, волейбол, өстәл теннисы, бадминтон, җиңел атлетика, шахмат, шашка һәм гер күтәрү буенча көч сынашты. Шашка буенча районыбыз данын яклаган Данир Шәрәфетдинов һәм Алевтина Хемницер барлык көндәшләрен дә отып, беренче һәм гер күтәрүдә Наил Шихранов өченче урынны яулады. Гомум команда буенча безнең спортчыларыбыз финалга үттеләр һәм ноябрь ахырларында Казан шәһәренең универсиадага дип төзелгән спорт залларында узачак ярышларда катнашачаклар.